Poslovne vesti - Makedonija

Аплицирање по електронски пат за ЦЕМТ-дозволи

Од задутре, среда, ќе почне годишното аплицирање по електронски пат за распределба на ЦЕМТ-дозволите за 2013 година и изготвување поединечен план како резервација на поединечни транспортни дозволи за превоз на стоки за наредната година, соопшти вчера Министерството за транспорт и врски.

Трговските друштва кои имаат лиценци за јавен превоз на стоки или лиценца за превоз на стока за сопствени потреби за ЦЕМТ-дозвола ќе можат да аплицираат на интернет-страницата www.dozvoli-mtc.gov.mk заклучно со 15 октомври до 24 часот.

За 2013 година Министерството за транспорт и врски има на располагање 1.200 годишни ЦЕМТ-дозволи за возила со стандард еуро 5, како и 800 месечни ЦЕМТ-дозволи за возила со еуро 4 и еуро 3 стандард. Процентот на покриеност со годишни ЦЕМТ-дозволи на возилата со еуро 5 стандард ќе биде од 78% на ниво на цела Македонија.

- Електронскиот начин на аплицирање и распределба го прави целиот процес максимално транспарентен, затоа што ја елиминира вклученоста на човечкиот фактор, исклучувајќи можност за коруптивно дејствување во работењето и истовремено ја олеснува процедурата за аплицирање заштедувајќи време и непотребни трошоци и за превозниците и за администрацијата соопштија од Министерството.